„Среќата не е само задоволство, не е резултат на богатство. Тоа е резултат на активна работа, а не на пасивно уживање во задоволството.“
- Robert Baden-Powell
Младите имаат потреба за здрав раст и правилен психички,
физички и ментален развој. Преку игра, рекреација и спорт,
младите физички правилно се развиваат, се учат на тимска
работа, доверба, самодисциплина, размислување, логично
мислење, почит кон другите, комуникација и друго. Овие
активности им помагаат на младите во соочување со
предизвици и ги спремаат за преземање активна улога во
своите средини.
Активностите кои им ги нуди СИМ (Сојузот на извидници на
Македонија) на младите, за задоволување на овие потреби, се:
кампови, прошетки во природа, игри, извиднички и спортски
натпревари, истражувачки активности, едукативни
работилници (правилна исхрана и лична хигиена, ненасилна
комуникација, толеранција, намалување на предрасуди и др.) –
активности кои ги поттикнуваат младите да усвојуваат здрав
стил на живот.
Програмата на СИМ опфаќа голем број на области, како што
се:
- Извидничко движење
- Духовност, култура, обичаи и традиција во Македонија
- Кампување, ориентација и движење во природа
- Техники на кампување и бивакување
- Сигнализација и други начини за комуникација
- Прехранување во природа
- Метеорологија и заштита од природни непогоди
- Растителен и животински свет
- Екологија и заштита на природа
- Физичка култура и здравје
- Работа и штедење
- Културно-забавни активности
- Активности за развој на заедницата
- Техники и вештини за органиазција, менаџмент, планирање и работа во тим, претприемништво
- Поттикнување креативност и иновативност
- Прва помош
- Корисни вештини
Членовите на извидничката организација, преку метод на
постепено, континуирано учење и напредување прилагодено
според старосни категории, стигнуваат до знаењa и вештини
во наведените области, кои не се добиваат во системот на
формално образование.
01 Развигорци
Деца на возраст од 7 до 10 години
Развигорците се најмладата категорија на членство во Сојузот на извидници на Македонија. Најчесто, тоа се млади деца на возраст 7-10 години. Во овој период, овие деца се отворена книга со неиспишани страници. Задачата на извидничката организација е да одговори на нивните потреби и нивната љубопитност, да ги научи на здрави навики и да го поттикне нивниот развој.
- Чувствителна категорија
- Не се адаптираат лесно
- Имаат селективна меморија
- Потребна им е мотивација
- Сакаат да знаат сѐ
- Имаат големи очекувања
- Брзо менуваат мислење
- Не се самостојни
- Полни се со идеи
02 Извидници
Деца на возраст од 11 до 14 години
Во категоријата извидници спаѓаат сите членови на извидничкото движење на возраст 11-14 години. Оваа категорија претставува столб на извидничкото движење бидејќи членовите кои припаѓаат во оваа категорија се најбројни. Извидниците се категорија која исто така е најчувствителна; тие влегуваат во период на рана адолесценција.
Категоријата извидници е тесно поврзана со категоријата истражувачи поради тоа што извидниците се во период на рана адолесценција, додека, пак, истражувачите се во период на доцна адолесценција. Затоа, програмата на овие две категории е многу важна и треба да ги исполнува нивните потреби и желби, со цел да им се помогне да ги откријат своите афинитети и да го определат понатамошниот тек на нивниот живот.
Извидниците уживаат во авантури, како на пример, качување по карпи, планински велосипедизам, кајакарство и кампување, и работат во групи со млади луѓе, со цел да ги исполнат возбудливите предизвици.
03 Истражувачи
Деца на возраст од 15 до 17 години
Истражувачи се извидниците на возраст 15-17 години кои се активни членови на извидничката организација.
Истражувач може да биде секое момче или девојка кои наполниле 15 години и имаат желба да истражуваат и доживуваат авантури. Тие патуваат и откриваат, постојано учат и се развиваат.
Во оваа категорија, тие заеднички креираат активности согласно зададените развојни цели, кои ги постигнуваат преку многу авантура, забава и дружење.
04 Ровери
Млади на возраст од 18 до 29 години
Ровери се млади луѓе на возраст од 18 до 29 години, посветени на забава и авантура, кои му служат на општеството преку извидничката програма. Постојат насоки за роверите кои постојано еволуираат и се развиваат, со цел да им помогнат максимално да го искористат своето време, да го развијат својот карактер и активно да ги вклучат во развојот на заедницата во кое живеат.
Извиднички Одред Феникс – Прилеп
е организација која претставува доброволно, воспитно-едукативно, непрофитно, неполитичко и самостојно здружение на граѓани за деца и млади, отворено за сите, без разлика на нивната верска, национална, етничка, полова и расна припадност.